Служба Собора новомучеников и исповедников Шатурских

В первую субботу месяца сентября
Служба Собора новомучеников и исповедников Шатурских

На велицей вечерни

На Господи, воззвах: стихиры, глас 1.

Подобен: Прехвальнии мученицы:

Всехвальнии новомученицы Шатурстии,/ вас ни тьма темничная потаила есть,/ но Небо прият вы/ и отверзошася вам райския двери/ и, многими страданьми в ня вшедше,/ радости вечныя наслаждаетеся./ Темже тепле Христу молитеся,/ Церковь Русскую в Православии утвердити/ и спасти души наша.

Прехвальнии новомученицы Шатурстии,/ вас ни прещения безбожных устрашиша,/ ни гонения и озлобления смятоша,/ ни узы и горькия работы изнуриша,/ но, ревностию о Бозе пламенеюще/ и внемлюще гласу Пастыреначальника Христа,/ даже до крове подвизалися есте./ Темже тепле молитеся ко Господу,/ Русь Святую в Православии утвердити/ и спасти души наша.

Преславнии новомученицы Шатурстии,/ вас ни глубины земныя потаиша,/ ниже рвы Бутовстии сокрыша,/ но Христос Бог восприят вы/ и, яко пришедших от скорби великия/ и кровьми убеливших ризы своя,/ венцы нетленными увенча./ Темже тепле Того молите,/ верныя люди в Православии утвердити/ и спасти души наша.

Ины стихиры, глас 5:

Противу гонителей злочестивых/ даже до крове подвизалися есте,/ богомудрии Александре, Иоанне, Арсение и Василие,/ доблественнии Назарие, Георгие и Иоанне,/ словом правды безбожных обличающе,/ и их, яко волков хищных, от стада Христова отгоняюще,/ едино на враги пособие имуще,/ Крест Христов, оружие непобедимое,/ и Знамение нашего спасения.

Яко воини Христови добропобеднии,/ преподобномученицы Тихоне и Аполлосе,/ пост и молитву, яко меч духовный изостривше,/ во бранех за веру Христову и паству/ враги видимыя и невидимыя низложили есте,/ молитвою, яко стеною необоримою,/ немощная чада стада Христова ограждающе./ Темже ныне, яко друзи Христови,/ Престолу Царя Славы предстояще,/ молите спастися душам нашим.

Доброхвальнии преподобномученицы/ Марие, Матроно и Марфо,/ от юности Христа возлюбившыя,/ Тому во ангельстем чине усердно послужили есте./ В годину же испытаний Церкве Русския,/ мужемудренную крепость явивше,/ веру Христову даже до крове исповедали есте,/ веселяще Ангелы и удивляюще человеки,/ ныне вас в песнех ублажающих.

Слава, глас 2:

Приидите, вернии, в дом Бога нашего/ лик победоносный восхвалим,/ избранную дружину, Христово воинство,/ новомученики и исповедники земли Шатурския,/ в лето огненнаго испытания/ живота своего не пощадивших,/ веру соблюдших и за Христа пострадавших,/ ныне же Престолу Святыя Троицы предстоящих/ и молящихся о душах наших.

И ныне, Богородичен, глас тойже: Прейде сень законная:

Вход. Прокимен дне. И чтения мучеником.

Деяний святых апостол чтение (4, 6-31):

В тыя дни собрашася во Иерусалим князи, старцы, книжницы/ и елицы беша от рода архиерейска./ И, поставльше Петра и Иоанна посреде, вопрошаху:/ коею силою или коим именем исцелиста хромаго./ Петр, исполнився Духа Свята, рече:/ князи людстии и старцы Израилевы,/ аще мы днесь истязуеми есмы о благодеянии человека немощна,/ о чесом сей спасеся,/ разумно буди всем вам и всем людем Израилевым,/ яко во имя Иисуса Христа Назореа,/ Его же вы распясте,/ Егоже Бог воскреси от мертвых,/ о сем Сей стоит пред вами здрав:/ Сей есть Камень, укоренный от вас зиждущих,/ бывый во главу угла,/ и несть ни о единем же инем спасения:/ несть бо иного Имени под небесем, даннаго в человецех,/ о немже подобает спастися нам./ Видяще же Петрово дерзновение и Иоанново и разумевше,/ яко человека некнижна еста и проста, дивляхуся,/ знаху же их, яко со Иисусом беста:/ видяще же изцелевшаго человека с нима стояща,/ ничтоже имяху противу рещи./ Повелевше же има вон из сонмища изыти,/ стязахуся друг со другом, глаголюще:/ что сотворим человекома сима;/ яко убо нарочитое знамение бысть има,/ всем живущим во Иерусалиме яве,/ и не можем отврещися:/ но да не более прострется в людех,/ прещением да запретим има ктому не глаголати о имени сем ни единому от человек./ И призваше их,/ заповедаша има отнюдь не провещавати ниже учити о имени Иисусове./ Петр же и Иоанн отвещавша к ним реста:/ аще праведно есть пред Богом/ вас послушати паче, нежели Бога, судите:/ не можем бо мы, яже видехом и слышахом, не глаголати./ Они же призапрещше има, пустиша я,/ ничтоже обретше како мучити их, людий ради,/ яко вси прославляху Бога о бывшем:/ лет бо бяше множае четыредесяти человек той,/ на немже бысть чудо сие изцеления./ Отпущена же бывша приидоста ко своим и возвестиста,/ елика к нима архиерее и старцы реша./ Они же, слышавше, единодушно воздвигоша глас к Богу и рекоша:/ Владыко, Ты, Боже, сотворивый небо и землю и море и вся, яже в них,/ иже Духом Святым усты отца нашего Давида отрока Твоего рекл еси:/ вскую шаташася языцы, и людие поучишася тщетным;/ предсташа царие земстии,/ и князи собрашася вкупе на Господа и на Христа Его./ Собрашася бо воистинну во граде сем на святаго отрока Твоего Иисуса,/ Егоже помазал еси,/ Ирод же и Понтийский Пилат с языки и людьми израилевыми,/ сотворити, елика рука Твоя и совет Твой преднарече быти:/ и ныне, Господи, призри на прещения их/ и даждь рабом Твоим со всяким дерзновением глаголати слово Твое,/ внегда руку Твою прострети Ти во изцеления,/ и знамением и чудесем бывати Именем святым отрока Твоего Иисуса./ И помолившимся им, подвижеся место, идеже бяху собрани,/ и исполнишася вси Духа Свята/ и глаголаху слово Божие со дерзновением.

К Тимофею послания святаго апостола Павла чтение

(2 Тим. 4, 1-8):

Чадо Тимофее,/ засвидетельствую убо аз пред Богом и Господем нашим Иисус Христом,/ хотящим судити живым и мертвым в явлении Его и царствии Его:/ проповедуй слово,/ настой благовременне и безвременне,/ обличи, запрети, умоли со всяким долготерпением и учением./ Будет бо время, егда здраваго учения не послушают,/ но по своих похотех изберут себе учители, чешеми слухом,/ и от истины слух отвратят, и к баснем уклонятся./ Ты же трезвися о всем, злопостражди,/ дело сотвори благовестника,/ служение твое известно сотвори./ Аз бо уже жрен бываю,/ и время моего отшествия наста./ Подвигом добрым подвизахся,/ течение скончах, веру соблюдох./ Прочее убо соблюдается мне венец правды,/ егоже воздаст ми Господь в день он, Праведный Судия,/ не токмо же мне, но и всем возлюбившим явление Его.

Ко Евреем послания святаго апостола Павла чтение

(11, 33-40):

Братие,/ святии верою победиша царствия,/ содеяша правду, получиша обетования,/ заградиша уста львов,/ угасиша силу огненную,/ избегоша острея меча,/ возмогоша от немощи,/ быша крепцы во бранех,/ обратиша в бегство полки чуждих./ Прияша жены от воскресения мертвых своих./ Инии же избиени быша, не приемше избавления,/ да лучшее воскресение улучат./ Друзии же руганием и ранами искушение прияша,/ еще же и узами и темницею./ Камением побиени быша,/ претрени быша, искушени быша,/ убийством меча умроша,/ проидоша в милотех, и в козиях кожах,/ лишени, скорбяще, озлоблени./ Ихже не бе достоин весь мир,/ в пустынях скитающеся и в горах и в вертепах и в пропастех земных./ И сии вси, послушествовани бывше верою, не прияша обетования./ Богу лучшее что о нас предзревшу,/ да не без нас совершенство приимут.

На литии стихиры глас 6:

Божиим произволением на подвиг страдальческий/ от всякаго рода и чина призваннии,/ новомученицы и исповедницы Шатурстии,/ во дни гонения безбожнаго/ правило веры и образ жития нам показали есте,/ да, Христу последующе верою/ и любовию пламенеюще,/ венцы Небесныя обрящем.

Слава, глас 2:

Путь тесный широту райскую отверзает:/ сие делом явили есте, новомученицы,/ путем страдальческим шествующе,/ вся даже до смерти верою претерпели есте/ и Царства славы достигли есте,/ идеже Древа Жизни наслаждаетеся./ Помозите и нам, страстотерпцы,/ веру Православную до конца сохранити/ и спасение улучити.

И ныне, Богородичен, глас тойже:

Богородицу и Матерь Света,/ присно в песнех величающе,/ ныне гласы умиленными воспеваем,/ яко даровала еси нам неистощимое сокровище/ собор новомучеников и исповедников Шатурских,/ Едина Чистая и Благословенная.

На стиховне стихиры, глас 2.

Подобен: Доме Евфрафов:

Днесь веселия исполнися/ дом Бога нашего,/ в немже память новомучеников/ земли Шатурския/ с похвалами совершается.

Стих: Господи Господь наш,/ яко чудно Имя Твое по всей земли.

Юншаго посреде градов Московских,/ малаго посреде великих/ возвеличи днесь Господь Шатуру град,/ в немже венценосную дружину/ новомученик прослави.

Стих: Святым, иже суть на земли Его,/ удиви Господь вся хотения Своя в них.

Взыграй, земле Шатурская,/ в день праздника твоего,/ и собор новомучеников прослави,/ яко сокровище велие и неистощимое,/ днесь приемлющи.

Слава, глас тойже:

Ликуйте ныне и веселитеся мучениколюбцы,/ земля бо наша славою новомучеников украшается,/ приимите покров Небесный святых ходатаев ваших,/ сии бо бдят и молятся о нас/ пред Престолом Вседержителя,/ да не оскудеет вера Православная,/ в нейже нам утверждение.

И ныне, глас тойже: О, чудесе новаго:

По Ныне отпущаеши: тропарь новомучеников дважды. И Богородице, Дево: единожды.

Тропарь, глас 4:

Яко украшение Церкве Русския,/ в годину лютаго испытания яви вас Господь,/ прием многоплодие трудов ваших,/ болезни, узы и смерть неповинную./ Темже и мы, сошедшеся днесь, велегласно вопием:/ пречуднии страстотерпцы Шатурстии,/ молите Увенчавшаго вас Христа/ сохранити земное Отечество ваше/ и спастися душам нашим.

На утрени

По 1-м стихословии седален, глас 6:

Сквозе огнь мучения, яко свидетелие вернии, прошли есте, блаженнии страдальцы,/ сего ради с лики святых земли Русския/ в Небеснем Отечестве торжествуете./ Помозите и нам, сродником вашим, веру Православную сохранити/ и молите спастися душам нашим.

Слава, и ныне, Богородичен:

Не умолчим никогда, Владычице,/ силы Твоя глаголати, недостойнии./ И ныне вопием к Тебе, Пречистая:/ моли Сына Твоего и Бога нашего/ со святыми новомученики и исповедники Российскими/ спасти землю Русскую,/ в ней же имя Твое православно величается.

По 2-м стихословии седален, глас 2:

Егда землю Российскую постиже испытание,/ тогда вы, новомученицы святии, отвсюду безбожными гоними,/ во едину победоносную дружину промышлением Божиим в земли Шатурстей совокупистеся/ и единомудренно за Христа пострадасте.

Слава, и ныне, Богородичен:

Ты еси Славо небесных и Упование земных, о Царице!/ Ты еси Похвало и Венчание мучеником,/ на Тя бо страдальцы земли Русския/ в муках велиих надежду возложивше,/ победно пучину лютых мучений проидоша./ Ныне и нам, предстоящим в храме славы Твоея,/ одожди милости Твоя пребогатыя.

Величание:

Величаем вас,/ святии новомученицы и исповедницы Шатурстии,/ и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

1-й лик: Бог нам Прибежище и Сила, Помощник в скорбех, обретших ны зело.

2-й лик: Господи, воздвигни силу Твою и прииди, воеже спасти нас.

1-й лик: Глаголах о свидениих Твоих пред цари и не стыдяхся.

2-й лик: Вси языцы обыдоша мя и Именем Господним противляхся им.

1-й лик: Тебе ради умерщвляемся весь день, вменихомся, яко овцы заколения.

2-й лик: Крепость и пение мое Господь и бысть мне во спасение.

По полиелеи седален, глас 8:

Днесь земля Шатурская торжествует/ и веселием духовным украшается,/ святии бо новомученицы, сродницы наши,/ в белых ризах предстоят Агнцу Божию/ и со Ангелы песнь хвалебную согласно воспевают:/ слава в Вышних Богу и на земли мир,/ в человецех благоволение.

Слава, и ныне, Богородичен:

О, Всепетая Дево,/ Тя вемы Покров земли Русския,/ Тебе бо, грешнии, имамы предстательство,/ Тебе стяжахом в напастех спасение,/ Едину Всенепорочную.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой.Стих: Разжегл ны еси, якоже разжизается сребро. Евангелие от Матфея, зачало 36.

По 50-м псалме стихира, глас 6:

О, блаженнии сродницы наши,/ часть благую на земли усердно взыскавшии/ и кровною куплею ту приобретшии,/ изыдите ныне, молимся,/ на взыскание нас, заблуждших,/ верою обнищавших и добродетельми оскудевших,/ да вами, присно покрываеми и наставляеми,/ дарами Духа Святаго обогатимся/ и безбедно часть спасаемых обрящем.

Канон, глас 6.

Песнь 1

Ирмос: Яко по суху, пешешествовав Израиль/ по бездне стопами,/ гонителя фараона/ видя потопляема,/ Богу победную песнь поим, вопияше.

Припев: Святии новомученицы и исповедницы Шатурстии, молите Бога о нас.

Господи Боже,/ очисти чувства и просвети наш ум,/ и сподоби достойно прославляти святых сродников наших,/ новомучеников и исповедников Шатурских,/ и, взирающе на кончину, подражати вере их.

Егда прииде испытание веры вашея, святии сродницы наши,/ страдания за Христа, яко благодатный дар, прияли есте./ Сего ради ныне Церковь Русская вами украшается/ и земля Шатурская похвалы приносит.

Страдания за Христа, яко дар благодатный, приясте, страстотерпцы./ Тем, изгнания, домов разорения,/ клеветы и неправедное осуждение,/ паче же узы и убиение мужественне претерпели есте,/ и ничтоже возможе разлучити вас от любве Христовой.

Богородичен: Яко Взбранная Воевода новомучеников и исповедников Российских,/ державным заступлением в духовней брани победу им на безбожныя подала еси./ Темже Тя, Пречистая Дево, ныне величаем.

Песнь 3

Ирмос: Несть свят,/ якоже Ты, Господи, Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

Егда прииде время испытания веры вашея, страстотерпцы,/ на Господа и Совершителя спасения все упование возложили есте/ и, от Него укрепляеми, пучину мучений победно прешли есте./ Ныне же, в радости небесней пребывающе, взываете:/ несть свят, паче Тебе, Человеколюбче.

Возвеличим, вернии, преподобномученика Тихона,/ пастыря добраго и мученика истиннаго,/ изволившаго паче умрети, нежели Христа и веры отрещися./ Темже, мученический венец прием,/ в радости небесней пребывает, взывая:/ несть свят, паче Тебе, Господи, Человеколюбче.

Похвалы приносим ти, преподобномучениче Аполлосе,/ иноческаго жития любителю и священнаго чина достойный носителю,/ ты бо, прещения безбожных и мук смертных не убоявся,/ верный ученик Христов даже до смерти явился еси./ Сего ради в радости небесней пребывая, взываеши:/ несть свят, паче Тебе, Господи, Человеколюбче.

Богородичен: О, Всепетая Богородице, Владычице,/ преподобных похвало и мучеников славо,/ ангелы восхваляемая и человеки воспеваемая,/ избави Церковь Русскую от всякаго злаго обстояния,/ Едина Благословенная.

Седален, глас 5:

В муках суще, святии, мучителем рекли есте:/ всуе ваша дерзость и погибельна,/ нам бо, еже жити – Христос,/ и еже умрети – приобретение:/ вместо ран телесных – светлое одеяние в Воскресении,/ за безчестие – венцы нетленныя,/ за узы темничныя – рай,/ за изгнание – сожительство со ангелы./ Тех молитвами, Христе Боже, спаси души наша.

Слава, и ныне, Богородичен:

Ублажим днесь, вернии, Заступницу нашу,/ Та бо, удел Свой издревле избранный, Русь Православную,/ во испытаниих горьких не остави,/ чад Церкве Христовы во страданиих укрепи/ и во обители Небесныя всели.

Песнь 4

Ирмос: Христос моя Сила,/ Бог и Господь,/ честная церковь/ боголепно поет, взывающи:/ от смысла чиста о Господе празднующи.

Божиим смотрением, святии,/ аще и разделени бысте телесне/ и един по единому на муки от безбожных осуждени,/ обаче, союзом любве Христовой связуеми,/ единомудренною дружиною за Христа пострадасте,/ вкупе же и в Царствие Небесное внидосте.

Пастырю милостивый и богомудрый наставниче, священномучениче Александре,/ града Шатурскаго изрядная похвало,/ четыредесять лет во священницех благочестно пожил еси/ и душу твою за паству положил еси./ Буди и о нас на Небеси ходатай верен.

Ублажим, вернии, священномученика Иоанна,/ делателя добраго винограда Христова,/ иереев удобрение, жития евангельскаго образ,/ смотрением Божиим за Христа пострадавшаго,/ о нас же в раи сладости непрестанно молящагося.

Богородичен: Тя, необоримую Стену и спасения Утверждение, Богородице Дево, молим:/ сопротивных советы разори,/ людей Твоих печаль на радость преложи,/ град Твой огради,/ о мире мира моли,/ яко Ты еси, Богородице, Упование наше.

Песнь 5

Ирмос: Божиим светом Твоим, Блаже,/ утреннюющих Ти души любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.

Богатство веры стяжавше, святии земли Шатурския, миру явленнии и неявленнии,/ вы, страдания, яко дарование Божие, приемше,/ венцы нетленными украсилися есте,/ правило веры и образ исповедания нам являюще.

Благонравием украсився, священномучениче Назарие,/ в подвизе поста, молитвы и воздержания жизнь твою проводил еси,/ темже ни темница, ни гонения, ни самая смерть/ возмогоша разлучити тя, от любве Божия./ Сего ради светло совершаем память твою.

Егда прииде время испытания,/ тогда безропотно претерпел еси беды многия, священномучениче Георгие:/ ближнии бо оклеветаша тя,/ безбожнии неправедно в темницу заключиша и на горькия работы осудиша./ Ты же, святе, даже до смерти непобедимь пребыл еси,/ Христу последовав верою.

Богородичен: Пресвятая Дево,/ Ты плотию родила еси Христа, Бога нашего,/ Егоже ради святии мученицы, смерть приемше,/ ныне во свете славы радуются./ Темже, Пречистая, и нас, страдания мучеников почитающих,/ Царствия Небеснаго сподоби.

Песнь 6

Ирмос: Житейское море,/ воздвизаемое зря,/ напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Господу последовасте верою, святии новомученицы,/ и, аще убиени бысте и безчестно в ров земный ввержени,/ обаче во Христе живот вечный приясте./ Ныне же Пасхи велия и священнейшия истее причащаетеся в невечернем дни Царствия Его.

Что тя наречем, священномучениче Арсение?/ Цвет ли духовный, яко добродетельми процвел еси?/ Грозд ли винограда Иисусова, яко кровь мученическую источил еси?/ Не престай молитися о нас, любовию чтущих память твою.

Мучениче Петре прехвальне,/ благогласным пением и чтением Богу добре послужив,/ вверенный ти талант, яко раб благий и добрый, страданием за Христа преумножил еси./ Темже в радость Господа твоего вшел еси,/ Емуже молися, святе, о чтущих память твою.

Богородичен: Пресвятая Мати Дево,/ изведи нас из рова погибели,/ яко древле Господь Иону из чрева китова,/ и уврачуй наша греховныя язвы,/ да неосужденно сподобимся прославляти пречестное и великолепое Имя Сына Твоего и Бога нашего.

Кондак, глас 2:

В житии добродетельми обогатившеся,/ во дни гонения безбожнаго,/ яко гроздие многообильное винограда Христова,/ кровь мученическую источили есте/ и во страданиих адаманта твердейшии явилися есте,/ новомученицы и исповедницы Шатурстии,/ молите Всеблагаго Бога/ даровати душам нашим велию милость.

Икос:

Спасовым победоносным Воскресением обогатившеся, святии,/ победно мучителей низложили есте/ и демонов немощныя дерзости сокрушили есте,/ сего ради с любвию вам в песнех возглашаем:/ радуйтеся, Церкве Русския столпи неодолимии,/ веры ради даже до крове подвизавшиися;/ радуйтеся, Иерусалима Горняго граждане новоизбраннии,/ и нас во след себе путеводящии./ Радуйтеся, ближайшии о нас ко Господу молитвенницы/ и усерднии ходатаи спасения нашего./ Радуйтеся, новомученицы и исповедницы Шатурстии,/ житием и подвиги светло просиявшии.

Песнь 7

Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие/ мучителя увеща вопити:/ благословен еси, Боже, отец наших.

Яко истиннии ученицы Безначальнаго Слова Христа,/ закон любве евангельския исполнивше,/ души положисте за други своя./ Темже, на Небеси в любви Трисветлей почивающе,/ и наша сердца ко всех любящему Богу обратите, во еже пети Ему:/ благословен еси, Боже, отец наших.

Безсребренником подражатель быв, священномучениче Иоанне,/ милость и сострадание людем присно являл еси,/ послежде душу твою за паству Христову положил еси,/ за вся благодаря Бога и поя:/ благословен еси, Боже, отец наших.

Ублажим, вернии, священномученика Василия,/ пастырский долг добре исполнившаго/ и венцем страданий украсившагося./ Сей бо, яко доблий воин Христов, Престолу Божию ныне предстоит/ и со святыми новомученики и исповедники Российскими взывает:/ благословен еси, Боже, отец наших.

Богородичен: Яже паче ума и естества Бога рождши, Неискусомужная Марие,/ чтущия Тя от враг видимых и невидимых избави,/ Ты бо еси земли отцев наших Держава необоримая.

Песнь 8

Ирмос: Из пламене преподобным росу источил еси/ и праведнаго жертву водою попалил еси,/ вся бо твориши, Христе, токмо еже хотети./ Тя превозносим во вся веки.

Во дни богоборныя брани новомученицы Российстии,/ якоже отроцы в пещи вавилонстей, огнем злобы не опалишася,/ честными бо потоки крове их пламень безбожия угасися./ Темже Избавителю вопияху:/ благословите, вся дела Господня, Господа.

Огнь испытаний тяжких и бурю лютых беззаконий мужественне претерпели есте, новомученицы,/ и, яко лествицею небовосходною, от земли в селения дивна, даже до Дому Божия, прешли есте,/ идеже гласом радования и исповедания Троице Единосущней поете:/ благословите, вся дела Господня, Господа.

Тричисленныя преподобномученицы Марие, Матроно и Марфо,/ тричисленныя дары Христу принесосте:/ страдания, яко злато,/ кровь честную, яко ливан,/ смерть непорочную, яко смирну,/ и, якоже древле трие отроцы, победную песнь воспевасте:/ благословите, вся дела Господня, Господа.

Богородичен: Христа зрящи умерщвляема, Многопетая Владычице,/ и, видящи исполнение Симеонова проречения, слезящи, взываше:/ благословен еси, Боже, во веки.

Песнь 9

Ирмос: Бога/ человеком невозможно видети,/ на Негоже не смеют чини ангельстии взирати,/ Тобою же, Всечистая, явися человеком/ Слово воплощенно,/ Егоже величающе,/ с Небесными вои Тя ублажаем.

Порфирою мученическою украсившеся, святии,/ Горняго Сиона страданьми достигосте/ и, тамо блаженства вечнаго наслаждающеся,/ молитвы вознесите ко Владыце о сродницех ваших.

Господи Боже наш,/ яко плод спасительнаго Твоего сеяния, приими новыя мученики и исповедники земли нашея,/ иже в лето спасительныя жатвы Твоея/ токи крове страдальческия источиша./ Тех молитвами, Человеколюбче, спаси души наша.

Ангелов хвалу и новомучеников славословие милостивно приемляй,/ не отрини, Триипостасный Боже, от сонма сего и нас, недостойных,/ но сподоби вкупе с ними воспевати:/ да благословит Господа Русь Святая и превозносит Его во веки.

Богородичен: Тя Преславную Божию Матерь,/ Славу Небесных и Упование земных,/ новомученицы и исповедницы Российстии славят, яко спасении Тобою./ Тех молитвами сподоби и нас, недостойных,/ прославляти Тя, яко усердную Заступницу нашу.

Светилен:

Света преумнаго зарею просвещаемь,/ лик светоносный днесь явися новомучеников и исповедников Шатурских,/ яже в нощи гонений безбожных, яко светильницы Христовы многосветлии,/ страданьми своими землю нашу просветиша и тьму нечестия в ней разсеяша./ Ихже ныне в песнех ублажаем.

Слава, и ныне, Богородичен:

Стена необоримая и Покров всемощный новомучеником явилася еси, Пресвятая Дево./ Буди и нам во всяцем испытании крепкая Помощница.

На хвалитех стихиры, глас 5.

Подобен: Радуйся:

Радуйтеся, новомученицы Шатурстии,/ Царя Небеснаго избранная дружино,/ вы в годину гонений на Цер­ковь Русскую/ на камени веры житие свое утвердили есте/ и, лютая мучения нивочтоже вменивше,/ кровь свою за Христа пролияли есте./ Ныне же, в Небесных кровех пребывающе/ и райскаго блаженства наслаждающеся,/ молитеся усердно Господеви,/ мир земли Российстей даровати/ и душам нашим велию милость.

Радуйтеся, страдальцы славнии,/ Церкве Русския столпи непоколебимии,/ похвало наша и утверждение/ и в житии благоотишное пристанище,/ вами бо земля Шатурская украшается/ и, яко сокровище духовное, страдания ваша приемлет./ Темже молите Прославльшаго вас Господа,/ в вере твердей нам присно пребывати/ и Царствия Небеснаго достигнути.

Радуйтеся, святии сродницы наши,/ Небеснаго Иерусалима граждане,/ вам приносим похвалы сия/ и со умилением взываем:/ путеводите нас ко спасению,/ наставляюще к нелицемерному покаянию./ Да вашею помощию и заступлением,/ добродетельно в мире поживше,/ Царствия Небеснаго сподобимся.

Слава, глас 8:

Приидите, мучениколюбцы вси,/ благочестно воспоим дружину славных мучеников,/ в земли Шатурстей пострадавших./ Сии бо, течение добре совершивше/ и веру Православную сохраньше,/ безбожных козни сокрушиша/ и от мира сего временнаго/ к вечному покою преставишася,/ идеже сладости райскаго блаженства наслаждаются/ и Престолу Божию предстоят,/ прославляюще Троицу Единосущную и Нераздельную.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

Или сей. Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженны от канона, песни 3-я и 6-я. Прокимен, глас 7: Бог нам Прибежище и Сила. Стих: Помощник в скорбех, обретших ны зело. Апостол к Римляном, зачало 99 (гл. 8, 31-39) Евангелие от Луки, зачало 105-106. Конец: Втерпении вашем стяжите души ваша: (гл. 21,8-19). Причастен: Радуйтеся, праведнии, о Господе, правым подобает похвала:

 

Тропарь:

 

 

Тропарь, глас 4:
Яко украшение Церкве Русския,/ в годину лютаго испытания яви вас Господь,/ прием многоплодие трудов ваших,/ болезни, узы и смерть неповинную./ Темже и мы, сошедшеся днесь, велегласно вопием:/ пречуднии страстотерпцы Шатурстии,/ молите Увенчавшаго вас Христа/ сохранити земное Отечество ваше/ и спастися душам нашим.
Кондак:

 

 

Кондак, глас 2:
В житии добродетельми обогатившеся,/ во дни гонения безбожнаго,/ яко гроздие многообильное винограда Христова,/ кровь мученическую источили есте/ и во страданиих адаманта твердейшии явилися есте,/ новомученицы и исповедницы Шатурстии,/ молите Всеблагаго Бога/ даровати душам нашим велию милость.
Молитва:

 

 

Молитва

О, святии сродницы наши, новомученицы и исповедницы Шатурстии, житием и подвиги светло просиявшии! Вы, Промыслом Божиим на подвиг страдальческий предызбраннии во свидетельство веры Христовы, в годину лютых испытаний Церкве Русския живота вашего не пощадили есте, изволивше муки многия претерпети и самую смерть прияти. Темже, кровьми, яко порфирою, души ваша украсивше, в Горний Сион на крылех страданий возлетели есте и тамо, полк божественный и велий новомучеников и исповедников Российских восполнивше, победныя почести от руки Спасителя прияли есте.

Сего ради ныне, совершающе с любовию память вашу, со умилением взываем: молите Господа и Совершителя спасения нашего Иисуса Христа, яко имущии к Нему дерзновение велие, Церкви Российстей даровати благостояние и крепость, Отечеству нашему мир и благоденствие, паче же оградите нас от ересей и расколов, междоусобных распрей и нестроений.

Ей, угодницы Божии! Милостивно посетите нас, недостойных чад ваших, суетою мира рассеянных, верою оскудевших и добродетельми обнищавших, подвизающе к истинному покаянию и христианскому жительству. Да вами, присно соблюдаеми и наставляеми, достигнем вожделеннаго Царства Небеснаго, идеже вкупе сподобимся прославляти и воспевати всесвятое Имя Отца и Сына и Святаго Духа. Аминь.

Акафист:

 

 

Акафист

Святым новомученикам и исповедникам Шатурским

Кондак 1

Избраннии новомученицы и исповедницы Христовы, небесных жителей пресветлая дружино, от земли Шатурския возсиявшии и в Небеснем отечестве венцы славы приемшии! Прославляюще прославльшаго вас Господа, песньми духовными восхваляем вас, заступники наша. Вы же, яко имущии дерзновение ко Святей Троице, от всяких нас бед свободите, зовущих:

Радуйтеся, новомученицы и исповедницы Шатурстии, житием и подвиги светло просиявшии.

Икос 1

Ангелов Творец и Создатель человеческаго рода во дни грознаго испытания земли нашея яви вас, страстотерпцы Шатурстии, людем страждущим образ твердаго стояния в вере и дарова вам благодать мужественне подвизатися и даже до крове пострадати. Сего ради, поминающе подвиги ваша, благодарно вопием вам сице:

Радуйтеся, святии, на страдания Богом призваннии;

радуйтеся, страстотерпцы, подвиг добре совершившии.

Радуйтеся, новых мучеников и исповедников священное сословие;

радуйтеся, горних небожителей преславная дружино.

Радуйтеся, новозакланнии агнцы, жизнь свою за веру положившии;

радуйтеся, в лице мучеников Христу, Агнцу Божию, на Небеси предстоящии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 2

Видя свирепство зверонравных гонителей, святитель всероссийский Тихон призва верная чада стати на защиту святыя матере Церкве и, аще послет Господь испытания гонений, уз и мучений, и самыя смерти, претерпети вся, на подвиг взирающе древних мучеников. Вы же, святии, последующе гласу сему, мучения добре претерпели есте, воспевающе Богу: Аллилуиа.

Икос 2

Разумом не разумевающе, сердцем зело болезновали есте, страстотерпцы, како земля Русская, удел избранный, мраком безбожия помрачися и грехом Каинова братоубийства осквернися. Темже, о разорении любезнаго отечества зело скорбяще, взывали есте: Воскресни, Господи, помози нам и избави нас имене Твоего ради. Мы же, исполнение молитв ваших зряще, ублажаем вас сице:

Радуйтеся, сонма страдальцев земли Русския украшение;

радуйтеся, подвига мученическаго новое сияние.

Радуйтеся, за Русь Православную изряднии молитвенницы;

радуйтеся, к Богу о ней приснии печальницы.

Радуйтеся, светильницы света, в весех Шатурских светло возсиявшии;

радуйтеся, страдальцы святии, подвигом мученичества Христа прославившии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 3

Силою Вышняго укрепляеми, пастырие доблии, стадо Христово, от беззаконных терзаемое, в любви и единомыслии соблюдали есте и, противу гонителей мятежных подвигом веры добре подвизающеся, козни их нивочтоже вменяли есте, глаголюще: страха вашего не убоимся, ниже смутимся, яко с нами Бог! Мы же, подвиг ваш мученический восхваляюще, Богу вопием: Аллилуиа.

Икос 3

Имуще разум злочестием потемненный, восхотеша пребеззаконнии гонителие единство церковное разорити руками скверных вероотступник и лжепастырей. Обаче ничтоже успеша, яко не воздремаша очи страстотерпцев на стражи веры Православныя, ниже умолкоша уста их, во еже всяк совет нечестивых разорити и верных во истине укрепити. Мы же, дивящеся подвигу их, взываем сице:

Радуйтеся, учений апостольских изряднии ревнителие;

радуйтеся, веры отеческия твердии хранителие.

Радуйтеся, суемудрие нечестивых дерзновенно обличившии;

радуйтеся, злохитрость и коварство их низложившии.

Радуйтеся, в нощи безбожия светом истины возсиявшии;

радуйтеся, за веру Православную добре подвизавшиися.

Радуйтеся, новомученицы и исповедницы Шатурстии, житием и подвиги светло просиявшии.

Кондак 4

Бурею злобы противу Церкве дышуще, нечестивии безбожницы храмы и обители святыя разориша, вас же, святии страстотерпцы, крова и пристанища лишиша. Обаче, благодатию Божиею укрепляеми, вся благодушно претерпели есте и, о мучителех с любовию молящеся, Богу взывали есте: Аллилуиа.

Икос 4

Слышавше безбожнии гонителие твердое ваше исповедание, злобою распаляхуся на вы, страстотерпцы, и, многоразличными муки терзающе, от места на место изгоняху, в темницы и на горькия работы заключаху, гладом и хладом изнуряху. Вы же, святии, терпение стяжавше, рекли есте: кто ны разлучит от любве Божия? Сего ради, дивящеся мужеству вашему, со умилением взываем вам сице:

Радуйтеся, древним мучеником житием и подвиги подражавшии;

радуйтеся, мученицы новоявленнии, добродетельми светло просиявшии.

Радуйтеся, в броню правды облеченнии;

радуйтеся, щитом веры огражденнии.

Радуйтеся, Церкве Русския благодатное прозябение;

радуйтеся, земли Московския похвало и украшение.

Радуйтеся, новомученицы и исповедницы Шатурстии, житием и подвиги светло просиявшии.

Кондак 5

Богосветлии звезды, ко Христу путеводящии, явистеся, новомученицы святии, в нощи гонения безбожнаго сияюще. Вас бо прещения мучителей не устрашиша, ниже темницы мрачнии потаиша, но свет ваш просветися пред человеки. Мы же, видяще ваше доброе исповедание, прославляем Отца Небеснаго, взывающе: Аллилуиа.

Икос 5

Видевше, яко властителие беззаконнии многия верныя в темницы заключаху и на мучение и смерть осуждаху, вы, святии, разуместе, яко приспе время и вам подъяти страдания за веру Христову. Темже тепле молили есте Господа, да укрепит вас в подвизе страданий и прославит Имя Свое. Мы же, воспевающе исповедание ваше, вопием сице:

Радуйтеся, жребия мученическаго не уклонившиися;

радуйтеся, в руце Божии себе всецело предавшии.

Радуйтеся, путем Христовым добле шествовавшии;

радуйтеся, мучения многообразная безропотно терпевшии.

Радуйтеся, Царствия Небеснаго победно достигшии;

радуйтеся, сладости райския богатно вкусившии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 6

Проповедницы всеобщаго Воскресения и жизни вечныя явистеся, новомученицы святии, земная бо вся отвергше и живота не пощадивше, веровасте, яко телеса ваша, аще и предани будут поруганию и тлению, обаче в нетлении и славе востанут. Ныне же в Небеснем Иерусалиме и Церкви торжествующих вкупе со ангелы и всеми святыми воспеваете Судии всех Богу победную песнь: Аллилуиа.

Икос 6

Возсияша светозарно добродетели ваша, всехвальнии мученицы Христовы, вы бо в точиле лютых гонений, яко гроздия Истинныя Лозы, кровь свою источили есте, еюже Церковь Святая украсися, яко багряницею и виссом. Сего ради прославляем вас сице:

Радуйтеся, винограда Христова гроздие многоплодное;

радуйтеся, вертограда Небеснаго цвети прекраснии.

Радуйтеся, покровом Божия Матере осененнии;

радуйтеся, щитом благодати Ея огражденнии.

Радуйтеся, в Небесных чертозех радостию наслаждающиися;

радуйтеся, зрением Сладчайшаго Иисуса утешающиися.

Радуйтеся, новомученицы и исповедницы Шатурстии, житием и подвиги светло просиявшии.

Кондак 7

Хотяще богоборцы суемудреннии веру Православную во Отечестве нашем искоренити, совет сотвориша, еже вся пастыри верныя избити и овцы стада Христова разсеяти. Сего ради руки на вас, святии мученицы, возложиша, беззаконному суду предаша и на смерть осудиша. Вы же, чашу страданий испивше, Христу последовали есте, воспевающе: Аллилуиа.

Икос 7

Новая Голгофа явися в земли Московстей на месте, нарицаемем Бутово, идеже новии мучители, древним в лютости подобящеся, поведоша вы, страстотерпцы всехвальнии, яко агнцев на заклание и люте умучиша. Аще же и предаша святая телеса ваша безчестию и поруганию, обаче Господь вас прослави пред ангелы и человеки. Мы же, дивящеся долготерпению вашему, сице вопием:

Радуйтеся, веры Православныя славнии провозвестницы;

радуйтеся, любве Христовы истиннии причастницы.

Радуйтеся, надежды несумненныя приемницы;

радуйтеся, премудрости Божия поборницы.

Радуйтеся, кротости и незлобия стяжателие;

радуйтеся, воздержания истиннаго учителие.

Радуйтеся, новомученицы и исповедницы Шатурстии, житием и подвиги светло просиявшии.

Кондак 8

Странно и чудно есть разумети, како святыя жены, естеством немощни, мужески за Христа пострадаша? Видевше бо честныя отцы и братию, на муки и смерть осужденныя, подвигом оных подражаху и Христа небоязненно проповедаху, воспевающе Ему: Аллилуиа.

Икос 8

Весь еси желание, весь сладость, Сладчайший Иисусе, — сице взывали есте, преподобныя жены, и на мучение, яко к венцу брачному, с радостию потекли есте. Егда же смерть от рук беззаконных приясте, душами чистыми, яко голубицы белокрилыя, в Чертог Жениха Христа воспарили есте. Сего ради приимите от нас похвалы сицевыя:

Радуйтеся, агницы пречистыя, Христу с любовию пожершыяся;

радуйтеся, страстотерпицы пречудныя, Небесному Жениху сочетавшыяся.

Радуйтеся, мудрости евангельских дев подражавшыя;

радуйтеся, во свете веры чисте пред Богом ходившыя.

Радуйтеся, обеты иноческия даже до смерти непорочно соблюдшыя;

радуйтеся, мужески страдания и смерть претерпевшыя.

Радуйтеся, новомученицы и исповедницы Шатурстии, житием и подвиги светло просиявшии.

Кондак 9

Вси святии Церкви торжествующия с радостию сретоша вы, новомученицы Шатурстии, яко победители, присныя други Христовы и достойная чада Царствия Его. Темже, почесть Горняго звания приимше, с благодарностию взываете Богу, Победителю смерти, хвалебную песнь: Аллилуиа.

Икос 9

Витийство человеческое не может по достоянию прославити подвиги и страдания мучеников и исповедников Христовых. Мы же, зряще вас, страдальцы земли Шатурския, славою и честию от Бога увенчанных, подвиги вашими назидаемся и, помощи улучити чающе, дерзаем с любовию воспевати вам сице:

Радуйтеся, стопам древних мучеников небоязненно последовавшии;

радуйтеся, лютое неистовство беззаконных мужественно обличившии.

Радуйтеся, воини добропобеднии, добле за Христа подвизавшиися;

радуйтеся, страстотерпцы славнии, кровию мученическою землю Русскую обагрившии.

Радуйтеся, страданьми и исповеданием в Небесная селения вшедшии;

радуйтеся, в белых ризах Агнцу Божию во славе Небесней предстоящии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 10

Спасения нашего усерднии ходатаи есте, новомученицы всехвальнии, сего ради молим: испросите нам у Господа утверждение в вере и благочестии, да, не падше и обленившеся, но бодрствующе и трезвящеся, все время живота нашего потщимся в смирении, целомудрии и братолюбии пребывати и за вся Бога благодарити, взывающе Ему: Аллилуиа.

Икос 10

Стена необоримая явися безбожным гонителем твердость ваша, святии новомученицы. Вы бо, звероподобнаго нрава тех не убоявшеся, на судищах, в заточениих, горьких работах и всяких скорбных обстояниих образ терпения и непостыднаго упования на Бога мужественне явили есте. Сего ради прославляем вас сице:

Радуйтеся, добропобедницы, подвиги вашими Православие утвердившии;

радуйтеся, крепцыи поборницы, гонения безбожных нивочтоже вменившии.

Радуйтеся, прехвальнии исповедницы, богопротивную власть дерзновенно обличившии;

радуйтеся, агнцы незлобивии, жизнь свою за Христа положившии.

Радуйтеся, христолюбцы, веру истинную дерзновенно исповедавшии;

радуйтеся, друзи Божии, сладости райския присно вкушающии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 11

Пение хвалебное усердно приносим вам, новомученицы Шатурстии, и чтим честная страдания ваша, вы бо, любве ради Божия, вся земная нивочтоже вменивше, души своя за Христа положили есте. Ныне же, в Небесных обителех пребывающе, вопиете Богу: Аллилуиа.

Икос 11

Светом трисиянным осияваеми, новомученицы Шатурстии, со всеми святыми предстоите ныне Небесному Царю и, яко светила светозарная, присно просвещаете души притекающих к вам с верою и любовию. Мы же, благодаряще Бога, дивнаго во святых Своих, прославляем вас сице:

Радуйтеся, тесным евангельским путем шествовавшии;

радуйтеся, узкими враты Небеснаго Царствия достигшии.

Радуйтеся, вся прелести мира и славу его нивочтоже вменившии;

радуйтеся, благодать врачевания душ и телес от Бога получившии.

Радуйтеся, достойнии Небеснаго Царствия наследницы;

радуйтеся, усерднии о нас пред Богом молитвенницы.

Радуйтеся, новомученицы и исповедницы Шатурстии, житием и подвиги светло просиявшии.

Кондак 12

Благодать, данную вам от Бога, ведуще, память вашу с любовию совершаем, страстоперпцы Шатурстии. Паче же умиляемся, како вы в годину всеобщаго отступления, до конца вся претерпевше, всем сердцем Господа Бога возлюбисте и ближняго, яко сами себе. Помозите убо и нам сия заповеди исполнити и крест свой безропотно понести, со благодарением взывающе Богу: Аллилуиа.

Икос 12

Поюще славныя подвиги ваша и твердое стояние в вере, крепцыи воини Христови, величаем долготерпение и ублажаем святую кончину вашу. Вы бо, лютых мучений не убоявшеся, телеса ваша, яко жертву непорочную, Триединому Богу принесли есте и от Него, почесть Горняго звания приемше, ликостояния со всеми святыми в ризах белых достойни явилися есте. Темже приимите от нас похвалы сия:

Радуйтеся, любве Христовы истиннии проповедницы;

радуйтеся, Царствия Небеснаго достойнии наследницы.

Радуйтеся, беззаконных мучителей смирением победившии;

радуйтеся, любовь евангельскую страданием запечатлевшии.

Радуйтеся, незлобию Христову добре подражавшии;

радуйтеся, образ веры и благочестия нам явившии.

Радуйтеся, новомученицы и исповедницы Шатурстии, житием и подвиги светло просиявшии.

Кондак 13

О, святии новомученицы и исповедницы Христовы, земли Шатурския похвало и славо! Приимите сие малое моление наше, с благодарностию вам приносимое, и предстательством вашим ко Господу испросите Отечеству нашему мир и благоденствие. Нам же, всем, даруйте веру непостыдну и любовь нелицемерну, да, в покаянии поживше, Царствия Небеснаго сподобимся, идеже купно с вами и всеми святыми воспоем Богу хвалебную песнь:Аллилуиа.

Сей кондак глаголи трижды. Посем икос 1 и кондак 1.

Источник http://www.newmartyros.ru/gimnografiya/gimnografiya-novomuchenikov-i-ispovednikov-shaturskih.html